Iturria: berria

«Topikoaz gaindi topo egin dute», Andoni Egaña bertsolariaren hitzetan, ustez eta itxuraz elkarrengandik oso apartekoak diruditen mundu bik: zientziak eta bertsolaritzak. Bertsolariak bertsoa egiten duen unean «informazioa gordetzeko eta berreskuratzeko duen berezko modua» neurozientzia kognitiboarentzat lagungarri izan daitekeela» iritzita, bertsolariak bertsoa egiten duen une horretan haren burmuinak zer jokabide duen ikertzen ari da Donostiako BCBL Basque Center on Cognition, Brain and Languagek (Kognizioaren, Garunaren eta Mintzairaren Euskal Ikerketa Zentroa), EHBE Euskal Herriko Bertsozale Elkartearekin lankidetzan.

Joan den urriaz geroztik, maila handiko 18 bertsolariri hainbat proba egiten ari zaizkie BCBLko ikerlariak, haien artean azken bi txapeldunak direla: Maialen Lujanbio eta Andoni Egaña. Parte hartu duten bertsolariek hiru proba egin dituzte. Lehen egunean, test psikoteknikoa egin zuten ordenagailu batean; bigarrengoan, erresonantzia magnetiko bat, hainbat proba egiten zituzten bitartean: esan ahalik eta segida azkarrenean m-z hasten diren hitzak, edo arra bukaera dutenak…; eta hirugarren egunean, erresonantzia magnetikoa, gaiak eman eta koplan edo zortziko txikian gai horiei erantzuten zieten bitartean.

Ondorioak, urtea amaitzerako

Bertsolarien ondoren, hainbat bertso eskolatako ikasleei egingo dizkiete probak BCBLn, eta ondoren bertsotan aritu gabeko euskaldunak pasatuko dira probalekuetatik, haien burmuinen funtzionamendua maila handiko bertsolarienekin alderatu ahal izateko. Urtea amaitzerako, lehen ondorioak aurkezteko moduan izatea espero dute, baina ondorioekin batera «galdera gehiago» ere izango direlakoan dago Miguel Arozena BCBLko gerentea.

Asier Altunaren Bertsolari filmaren grabazioan sortu zen bertsolarien eta zientzialarien arteko aurreneko kontaktua, iazko apirilean, filmaren pasarte batean Andoni Egaña BCBLn erresonantzia magnetiko bat egiten dioten bitartean bertsotan ageri baita, Altunak gidoia idaztean pentsaturik zuen bezala. Elkarraldi hartan Manuel Carreiras BCBLko zuzendaria harrituta gelditu zen Egañak azaldu ziolarik hitzak burmuinean margariten petaloen modura banatzen zituela hitzak multzotan. Bertsolariak beren burmuineko informazioa antolatzen adituak direla pentsarazi zion horrek. «Bertsolarien kolektibo honek dakarren gaitasun berezi hori kontuan hartuta, bagenekien hor zerbait zegoela», ekarri du gogora Arozenak. Horregatik, orain benetan gauzatzen ari da filmean irudietan itxuratu baino ez zen ikerketa zientifikoa.

Ikerketak material zientifiko interesgarria eman dezakeelakoan daude BCBLko neurozientzialariak, batez ere garunak hizkuntza ekoizpenarekin lotutako funtzio konplexuak burutzeko erabiltzen dituen mekanismoen ingurukoa. «Ahozko transmisioan adituak direnen hizkuntza ekoizpenaren eta prozesu kognitiboen ikerketak bide asko zabaldu ditzake hizkuntzaren neurozientzia kognitiboaren inguruko oinarrizko galderetan», Kepa Paz-Alonso BCBLko ikerlariaren ustez. «Bilakabide kognitibo eta hizkuntzazkoen korrelazioak ezagutzeak gaurko teoriei informazioa eskain diezaieke hizkuntzaren neurozientzia kognitiboaren esparruan».

Bertsolarien burmuinak ikergai izatea ez dela bertsolariak beste inor baino azkarragoak izatearen ondorio ohartarazi du Iñaki Murua EHBEko lehendakariak. «Nik garbi utzi nahi nuke ez garela ezer berezia», adierazi du. «Urte askotako entrenamendua eta horrek ematen duen gaitasuna daukagu, baina zuetako edozeinek ere entrenamendu hori egiten asmatuko balu, eta nahi izango balu, bertsotan egiteko aukera izango luke».

Honats parte hartuko duen lehen taldea, 87koa, kiniela guztien arabera faborito dena:

Eskuinean ageri zaiguna grina handiz ageri zaiguna Ibon Aristi duzue. Sorosle ilehoria eta biologoa, azken bi urtetan indartsu azaldu zaigu Motxian, ekintzarik gehienetan antolatzaile papera hartuz. Bat-batean hasi berri samarra izan arren, errimen teknika bikain menperatzen du eta doinu zailak erabiltzen ahalegin berezia egiten du, eztarriak gehiegi lagundu ez arren.
Argazkiaren ezkerraldekoa Iosu Villanueva duzue, musikazaleontzat MKTko gitarrajole edo Isuo Sasiia kantautore bezala ezagunagoa eskola zaharreko bertsolaria degu, baina ez oinarririk gabea. Ofizialki Motxianeko kide ez den arren, bere txikitako Etxebeltzeko urteak ez ziren alferrikakoak izan, eskolartekoan idatzitan aipamen berezi eta guzti. Gainera oholtza gainean ohitua, patxadatsua eta artista ezpalekoa, ojo Iosurekin, konfiantzaz beterik dator eta.
Erdialdeko pelele hori Aitor Urbieta duzue, taldeari eutsi beharko liokena. Aspaldian Iberdrola gora eta Naturgas behera, nahi adinako arretarik ez dio eskaintzen bertsoari, baina gogotsu eta motibatuta dator aspaldiko partez jendeaurrean kantatzera, beretik ematen badu, erdia baino gehiago eginda izango dute. Azken aldian 3 kide hauek oso bateratuta eta elkartuta daude, gainera Markinan erregetan egindako stage-ak on egin die eta katedraren arabera faborito dira erronka honetarako.

Beste taldea, 88koa, gazteena ere aurkeztu gabe ezingo dugu utzi ba. Hemen dituzue:
Eskuinaldean ikusten duguna Oier Aranzabal jauna dugu. Zer den baino zer ez den esaten uste dut errezagoa dela, zer ez du egin izan ere mutil honek: kazetari, musikari, irrati-esatari, aurkezle, telebistako tertuliano, nobela idazle, Athletic-eko peñen sortzaile, Kalapita eta Arrabots aldizkarien sortzaile etabar etabar… Horrek guztiak ematen dion konfidantzari eskerrak bertsotan ere moldatzen da, ez moldatu bakarrik, gpuntua probatzera ere ausartu baitzen. Ez dakigu ondoegi prestatu den zita honetarako, baina kokilduko ez dela badakigunez ez da erreza izango gain hartzea.
Ezkerraldekoa ere ezaguna dugu ba, Oier Aizpurua jaun txit prestua. Bertsokatearen eta Motxiaren ardatz eta euskarri, taldearen pisua eramateko ardura izango du Bilbon Masterra edo nik ez dakit zer ikasten duen kimikari azkar honek. Hasi uda aurretik eta uda ondoren gpuntuan eta baita Lizardin ere txapeldunorde geldituz maila aparta eta oso erregualarra eman du, ia akatsik gabea, eta abenduan Kopla Txapelketan ere artean mailari nahiko ongi eusten ziola frogatu zuen. Ez da harritzekoa beraz, egin duen denboraldia eginda urte sasoi honetan bere sasoi puntua beherago egotea. Hori bai, dantzan eta horrelako filigranak egiten dotore asko moldatzen dela erakutsi digu azken egunetan, Argentina aldean ikasitako eskola nunbait. Horrek ordea gaztetxeko erronkarako ez dio ezertarako balioko.
88ko hirugarren kidea, argazkian ateratzen ez dena Unai Escobar duzue aski ezaguna. Enpresari ikasle fina eta futbolari eta korrikalari zaildua, bertsozale amorratua genduen eta teknika nahiko ondo menderatzen zuen baina ahotsak ez zion laguntzen. Bere kideek soberan dituzten ausardia eta konfidantza (harrokeria ez esateagatik) izan balitu, oso bertsolari polita genuke. Azken urte honetan, ordea, ikasketak eta bestelako egoerak tarteko bertsoeskolatik erabat aparte dabil tamalez, baina erronka honetarako hitza emana zuenez baiezkoa eman du eta animoso dagoela dirudi. Talde honek zer emango duen inkognita bat da, aspaldian ez baititugu apenas ikusi, baina jendeak ez du diru askorik jokatu hauen alde.
Gai-emaile Hodei Iruretagoiena “Xaporra” bertsolari entzutetsua izango da, eta epaile Putzuzulora bertaratzen den jendea, txalometroaren arabera. Plan polita, beraz, ostiral honetarako, zuk bertsozale, har zazu Zarauztik gure gonbidapena.

Hiru kolorek dizdira
futbolaren aitzakira
“OFIZIALA” sentimendu ta
amets bat hori da
aldarrikapen segida
ateraz zelai erdira
geurea dena lortuko dugu
partidaz partida.

“Euskal herrikoa” omen
“Euskadikoa”, “euskal” den
gauza berari jarri nahiean
horrenbeste izen
orain, denok eta hemen
behingoan elkar gaitezen
ez dugunari izena jartzen
hasi baino lehen.

Baina hauxe futbola da
gol falta omen da traba
asteazkenean izan genuen
hortako parada
pentsatu dezagun hara
kantuak dion erara:
zelaian galdu ezkero ere
irabazle gara.

“La Roja”-k dakarren grina
ei da konparaezina
hemen badugu gu izanaren
sentipen sorgina
eskuetan ikurrina,
barrenean ahalegina
esperantzaren berdez tindatu
dugu herrimina.

MariMatraka

Gendarmeak, larre berde,
teila gorri, etxe zuri
kantatuz azken agurra
ematen dizugu zuri
Kantu hau izan liteke
gure Euskal mugaren zubi:
zer Ifarra, zer Hegoa?
zer ezker ta zer eskubi?
Hil zinen gau hartan zenbat
oihu ta bertso urduri
Gau hura bilakatu zen
abesti baten irudi.
Jada badira urteak
ezin zaitezkeela mugi,
ordutik, zerua itsaso
zikin bat dela dirudi.

Martinen izena entzunda
nola ez jarri nostalgiko?
Hari ez ote zitzaion
plaza bihurtu errito?
Bertan zenbat kantu ozen,
zenbat bertso, zenbat zirto;
Hala ere galeretan
bihurtu zen hura mito.
Gendarmeek gartzela batez
zituzten ametsak ito
Bertara eraman eta
han utzi zuten betiko.
Ez dela inoiz itzuli
esaten du Sarrik tinko:
ez da inoiz itzuli ta
ez da inoiz itzuliko.

Fuentefrio Jaun Ahaltsua

1. Fuentefrio Jaun Ahaltsua: -11p
2. Amaia: -12p
3. Manu: -18p
4. Hooligan: -18p
5. Xagua: -20p
6. Marimatraka -22p
7. Pello Errota: -22p
8. Txika del Koro: -28p

Honenbestez, Fuentefrio Jaun Ahaltsuak freskagarri bat irabazi du (Larraitzen baimenarekin trago eder batean bihurtu daitekena), eta nola ez, baita denek desio zuten beste bi sari ere, Manu Eta Xaguaren muxu bana hain zuzen ere. Bestalde, bigarren sailkatu den Amaiak inbidi galanta eramango du etxera.

BBG

Hernaniko azken final-aurrekoko eztabaida eta aurpegi txurien ondoren (gure kronikagileak bere haserrea tarteko uko egin dio kronika egiteari) iritsi da gpuntuko finala, azken saioa, azken tekla, azken puntua. Ta ohikoa degun eran, finalak porra bat zor. Badakizue beraz, betiko eran atea kalkulagailuak, zorroztu arkatzak, bota kartak, aztertu Marymatrack, Fuentefrio, Hooligan ta konpañiaren kronikak, edo jarri desio dezuten hoi atzekoz aurrea; nahi dezuena, baina in tzazue zuen kiniela, sari zoragarriyak zuen zain daude ta!!! Baina sariyan aurretik azal dezagun puntuazio sistema eta porran parte hartzeko araudiya.

Gure puntuaziyo sistema, bertsoak epaitzeko epaileen sistema bezela 2009ko txapelketa nagusiko bera izangoa. Zuek postuz-postuko sailkapena eman beharko dezue. Txapelduna asmatziak 10 puntu baliyokoitu, bigarren sailkatua asmatziak 5 puntu eta hirugarren sailkatua asmatziak 3 puntu. Horrez gain, asmatzen ez dan postu bakoitzagatik puntuak kenduko dia. Zenbat? Norbeak jarri diyon postutik urrundutako postu kopurua aña. Alegiya, txapeldun jartzen dezuenak 8. ite baldin bau -7p, 5. jarri dezuenak txapeldun ite bau -4p,…

Porran parte hartzeko arauak betikuak dia. Partehartzaile bakoitzak gutxienez eta gehienez kiniela bat in ahal izangou. Berdinketen kasuan lehenbizi indako kiniela izangoa nausi. Kiniela ezizenez siñau leike, betire sariyak jaso ahal izateko pertsonan identitatia aurrez ezaguna ez baldin bada email bidez BBG-ko ordezkari bati adierazi ezkeo. BBG-k ez du aldaketaik ingo bere sailkapenian bertsolari batek txapelketa eta gero positibo eman eta bere postua galtzen bau. Bestalde, parte hartzaile batek ezizen faltsuz kiniela bat baino gehiago eingo balitu automatikoki kaleratua izangoa.

Ta oain danoi interesatze zaizuena!!! Sariyak!!! Esan berra dao krisiya BBG-ko ateaño iritsi dala, dana dala gure babesle fidelenen deian zain gaude ta pixkanaka jungo gea sari geyo jartzen. Oaingoz hau da BBG-k ziurtatu dezaken bakarra:

Irabazliantzat:Trago edo frexkagarri eder bat eta Manu eta Xaguaren muxu bana.
Bigarrenantzat: Inbidiya galanta.

Egin trabes bertsozaleok!!!!!!!!!!!!!!!!!!

BBG

Fuentefrio Jaun Ahaltsua

Saroi Jauregiren esanetara ariko dira finaleko txartelagatik borrokan sei bertsolariak eta fase honetako ariketek agintzen duten lez banan bana atera dira.Hasteko hiru punturi erantzun behar izan diete.Adina eta denbora aipagai izan dituzte,eta oraingoan esan nezake epaileekin nahiko ados geratu naizela.Ariketa puntuatuena Nerea Elustondorena izan da eta baita nire iritziz osoena ere.Sarriegik poto egin du baina hala ere jakin du saioa aurrera joan ahala gora egiten.

Oholtza gainean seiak batera zeudela hasi dira Elustondo eta Agirre zortziko handian.Bi modeloren ahotsean Photoshoparen buelta aritu dira.Nahikoa dotore jardun dira eta ale politak utzi dizkigute.Nereak argi esan du berak nahiago duela denean irten nahiz ta pasatu kilotan,anorexiak jota dagoen gizarte xelebre hontan.Unaik ondo errematatu du ofizioa amonentzat gutxiegi eta aldizkarientzat gehiegi dutela esanaz.

Izagirre eta Lizasorentzat gaia: ”25 urteko seme bat duzue. Gaur ezagutu duzue bere bikotekidea.Bera baino 20 urte zaharragoa da”. Nahiko errealista joan dela esango dut,nahiz eta ez den guztiz osoa izan.Niri Lizasoren lana ikaragarri gustatu zait hala ere,kariño berezia hartu diot txapelketa honetan.

Urtebeteko haur bat duten gurasoen paperean jardun dira Irazu eta Sarriegi.Biak etxera heldu direnean ohartu dira haurra haurtzaindegitik jasotzea ahaztu zaiela.Zortziko handiko ofiziorik osoena izan da hau eta epaileen puntuazioan igarri da hori.

Lehen bi ariketetarako jada esan dut bezperako saioa beroagoa izan zela eta hala ere puntuazioak gaur gorago joan dira.Hau ere txapelketa da…

Puntutako ariketa da faseko berrikuntzetako bat eta bertsolarientzat antzekoa ez dela pentsatzen dudan arren entzule gisa gustura entzuten da.Sarriegi eta Agirre jarri ditu Saroik parez pare,honela zioen beraien gaiak: ”Gaurko saiora etorri zareten bi entzule zarete.Hauxe iruditu zaizue momenturik onena kanpora erretzera joateko”.Beraien buruari barre egiten asmatu dute eta lasai zeuden irudipena dut,bertso bat gehiago kantatu baitute.Beste puntukakoak ez dira horren bero eta umoretsu joan,eta azken hau soilik aipatuko dut.

Seiko motzeko ariketak goitik joan dira puntuazio eta  giro aldetik ere,baina nik nireari jarraituko diot:bezperako saio beroagoa izan zen irudipena dut.

Izagirre eta Sarriegi sei puntuko motzean dotore jardun dira eta txapelketa honetan lehen aldiz “Mendian gora haritza” doinuan jardun dira azken hauteskundeetako emaitzei begira.Izagirre itxaropentsu eta Sarriegi berriz ez.Perla politak utzi dituzte,horren adibide da Sarriegiren “baina Españan mapa osoa urdin-urdin dago”.

Beste bi bikoteak ez dira horren distiratsu aritu,eta horregatik izango da bi hauen lana puntu gehien jaso dituena.

Azken ariketa kartzelakoa izan da,honela zioen gaiak:”Azken ordu erdian hamabost aldiz begiratu diozu ordulariari”.Irazuk ospitaleko itxarongelan zain dagoenaren paperetik kantatu ditu hiru bertsoak,eta geroago azaldu duenez ez da guztiz gezurra esan duena.

Baina dudarik gabe,Izagirrek egin duen kartzelakoa itzela izan da.Beretik kantatu duela esango banu asmatuko nuke gero!Giroa orduan heldu da bere punturik gorenera.Kartzelakoan ohikoagoa izan ohi da seriotik jotzea baina entzuleok eskertu dugu Iñigoren umorea.Neska batekin geratuta zegoela eta neska ez dela agertu aipatu du lehen bertsoan,eta susmoa duela ez dela etorriko.

Agurrekin amaitu da saioa.Bertsolari guztiak oroitu dira etxekoekin,baina Beñatek lortu ditu txalo gehien.Ni eta alboan neukan M@1@L€N negar malkotan urtu gara aitonari egin dion aipamena entzutean.Merezi du, entzun ezazue.

Honela geratu dira puntuazioak:

Jexux Mari Irazu sailkatu da Beñat Gaztelumendirekin batera zuzenean Ilunbeko final handian kantatzeko.Gainerakoek Hernaniko saioaren zain egon beharko dute.

MariMatraka (Berandu egina egin gabea baino hobea dela diote…)

Ordu batak aldera geratuta geunden bertso eskolakoak antolakuntzako talde osoaz batera bazkaltzeko baina gaur ere berandu… Ordu laurden inguru paseak zirela heldu gara eta hara non zeuden GPuntuako idazkariak,gai-jartzailea eta antolakuntzako arduradunak frontoi kanpoan tragoa eskutan.Frontoi aldera begiratu eta gaztetxeko eta antolakuntza kide batzuk oholtza jartzen bukatzen dabiltza.Gu bazkaltzera:entsalada,marmitakoa eta bizkotxoa.Hitzetik Hortzerako taldea agurtu eta on egin!

Arratsaldeko hirurak aldera heldu gara frontoira.Ordurako oholtza eta aulkiak jarrita zeuden eta beraz guk peto gorria jantzi dugu eta sarreran egin behar duguna zer demontre zen esan digute.Lauretan la chica del coro-ren deia:sarrerak hartzeko esan amari eta antolatzaileekin barrura.

Bostak laurden gutxiagotan zabaldu da sarrera eta txartel guztiak pasa ostean bertsolariak aterako diren ateen alboko sarrerak zaintzen jarri naute.Banaka atera dira kartzela bezala balio izan dien gaztetxetik eta hasierako agurrak bota ostean hiru puntuei erantzun diete.Agurretan gehienek txapelketa eta bere geltokiak aipatu dituzte eta lehenengo barre algarak Aginek eta Ibanek kantatutakoek eragin dituzte.Felixek ametsek duten indarra aipatu du, ametsak betetzen ari den seinale agian.Puntuak ere txapelketaren ingurukoak.Denek esperantzaz eta nahiko txukun erantzun dituzte.Nahiz eta hasieran ez genekien amildegi ertzean egotea baino okerragoa den ariketa hau nola irtengo zen,badirudi asmatu dutela.

Zortziko handiko ariketara pasa dira behin oholtzan seiak zeudela.Kantuan aritzen lehenengo bikote Alaia eta Beñatek osatutakoa izan da, lantokian loterian jokatzeko izena eman ez duten  bi lankideren paperean.Beñat “aukeran ordea joño / miraritikan gehiago dauka loteriatikan baino” esanaz hasi da eta Alaiak “bestela gero egongo gera pobre eta inbiritan” erantzunaz jarraitu dio.Gai-jartzaileari erreferentzia eta guzti amaitu dute bertsoaldia.

Bigarrenak Agin eta Iban izan dira 300 euroko telefono faktura duen hamasei urteko alaba bat duten gurasoen ahotsetik kantari;esango nuke ez direla lehenak bezain ondo aritu baina argi utzi dute onena aurrez aurre hitz egitea dela.

Azkenak Felix eta Iker sekta bateko bi kideren azalean jarrita.Umoretsu joan da saioa biek ala biek izan dituzten ateraldiei esker,batez ere Iker izan da saioa umorera bideratu duena eta Felixek ederki jarraitu dio.

Zortziko txikian puntuka jardutera salto egin dute bertsolariek.Agian umoretsuen eta arinen joan den ariketa honetan hasi direnak Alaia eta Iban izan dira,pelukeriara ezkontza baterako joan diren bi lagunen ahotik kantari.

Ondoren Felix eta Agin aritu dira tanatorioko bi langileen arteko pikea hezurmamituz: hildako dotoreago nork jarri lehian zebiltzala entzulegoaren barre algara eta txaloak ugarituz joan dira,dotore aritu dira beraiek behintzat!

Azkeneko ofizioa osatuz Zubeldia eta Gaztelumendi beraien hamar urteko haurren futbol partiduari begira: erreala gora,semeen hanka okerrak behera arin joan da hau ere; hala eta guztiz ere,Zubeldiak adarra jotzeko duen abilezia gailendu da hemen ere (edo hori iruditu zait behintzat).

Eta seiko motzera pasa dira Alaia eta Felix.Saioko ofiziorik osoena eta estimatuena izan da agian honakoa.Felix bere beretik aritu dela argi geratu da egia esan, ”sendatuaren poza ezin da dirutan ordaindu” eta “bizitzan bideak dira medikuon eskuak” bezalako perlak utziaz.Alaia ere nahikoa ondo sartu da paperean eta heriotzari begira bizi dela dirudiela esan du lehen bertsotik.

Gero Iban eta Iker, Iker eta Iban.Bi goierritarrak kantuan aritu dira elkarri zirika.Ataundarra bizilagunaren paperean eta zegamarra bere ezkaratzean lotara sartu denaren ahotik.Animoso joan dela esan nezake ,baina animosoegi joan dela esango dut.Izan ere,gaiari sinesgarritasuna ere falta izan zaio momentu batzutan.

Azkenerako Agin eta Beñat haurdun dauden bi emakumeren paperean jardun dira;lehenak sufritu besterik ez du egin orain arte eta bigarrenarentzat gozamen hutsa izan da.

Orain artekoan Alaia eta Beñat ikusten genituen lehen postuaren lehian eta kartzelaren esku utzi dugu erabakia.Gaiak horrela zioen:”egoerak bultzatuta azkenean dimisioa aurkeztu duzu”. Nik Aginen lana nabarmenduko dut,nahiz eta berez nahikoa nabarmendu den. Ederrak izan dira burumakur ikusi nahi luketen baina ikusten ez dutenen Berlusconi baten ahotik kantatutakoak,ederrak beste hitzik ez dut aurkitu.Beñaten potoa gorabehera niri ikaragarri gustatu zait Berriako zuzendariaren dimisioari kantatu dizkion hiru bertsoak.

Horrela geratu dira azkenean puntuazioak,Beñat Gaztelumendi garaile:

Saio bukaeran agurrak eta txalo zaparrada,kiniela asmatzeko gai ez garenon barreak eta antolakuntzakook jaso ditugun hirurehun aulkiak.Txaleko gorria erantzita gustura egoteko moduko saioa egin duten irudipenaz joan gara kanpora.Bihar Tolosan jokatuko da bigarren finalaurrekoa,biharkoaren emaitzek esango dute nolakoa izango den finala.

GPuntua gero eta gertuago dugula dirudi,sarri ondotik pasatzen dira bertso batzuk:txapelketaren helburua eta helmuga Ilunben bakarrik ez dagoela dirudi…

MariMatraka

Doinua: Habanera

2001eko
gran reserva bat itzela,
gurasoen ezkontzako
2 kopa eta mantela,
argi bakartzat txinoan
erositako kandela,
Diana Krall-en ahotsa,
sensual beti bezela;
9ak bost gutxi,
listo daukat egongela.
Olioa, binagrea,
perrejila, moskatela,
nahasketarekin busti det
labean neukan okela.
Primeran aterako da
gure lehenengo gaubela.

9ak ta erdi
iada heltzear behar du,
ileak ondo ipini
eta labea itzaldu.
10ak bost gutxiago,
beti zai egon behar gu,
izane egun berandu
heltzea modan daukagu.
10terdiak pasata,
bidean ote da galdu?
Telefonoz deitu diot,
Buzón Movistar zabaldu…
Ardoa berotu da ta
okelak hozten dihardu.
Gauerdia heldu da ta
oraindik ez da azaldu.

Kandela amatatu da,
argirik ez dago bate,
ikusi nahi ez dunantzat
hau ez da izaten kalte,
baina hau ez onartzea
gehiegizkoa litzake,
bakarrik nago ta gaurre
hala egongo naiz nunbaite…
Ze krixto orain iriki
behar det Heredad de Ugarte,
nork maiteko nau ez badet
neuk nere burua maite…
Behin ta berriz nere alde
topa egingo det jo ta ke,
lehenengo aldiz egunak
neretzat argitu arte.

Xagua